陳澔賢醫生

陳澔賢醫生醫生- 尋醫經歷詳述:
第三年去陳醫生處檢查覆診！當年做的植牙還是不錯！
醫務所越來越繁忙，請埋其他醫生幫手！陳澔賢醫生依然保持自己覆病人msg！實在難得
洗牙師替我洗牙十分細心，覆診拍攝x光後請陳醫生檢查 亦都發現植牙無發炎
只有好醫生先會越來越多人等，不過無計，好醫生係要跟！加油啦


簡評:
個人觀感- 醫術精湛、鉅細無遺
經歷過程- 求診病人實在太多，等候需時
推介意見- 已視為本人的必然選擇

陳澔賢醫生醫生- 尋醫經歷詳述:
真係好慶幸做箍牙，搵到一個牙醫可以識做箍牙，植牙同杜牙根！
我幾年前因為蛀牙，右上大牙拔除。今次右邊又牙蛀牙。所以一個全部都識既全科牙醫好緊要。陳澔賢醫生同我分析箍牙，植牙 同杜牙根不同組合既治療方案。矯正專科要我脫多幾隻牙，但我唔想，驚個樣變化太大。所以我尋求醫生可以比另一個方案，整返多幾隻牙。
陳醫生最後比一個方案我，箍牙一隻牙都唔脫，箍完再做植牙頂住個位置。但由於D牙歪得太犀利，只可以用傳統鐵線箍牙箍返開個位。
過程其實都算輕鬆愉快（不過有時候覆診真係會等得比較耐），而且陳醫生好細心 同埋 勤力。每次有任何牙釘，鐵線甩出來，可以即刻自己wtsapp 醫生，醫生超級快會response。唔好睇少lee個服務，因為中途有任何問題心情真係好驚，醫生立刻回應同處理，你會安心好多。而且有任何問題和意見，都可以隨時比意見醫生。醫生好忙時候，夜晚可以wtsapp慢慢問。我試過箍牙期間智慧齒腫左，陳醫生第二日就可以安排幫我脫埋。 箍牙期間我係用自鎖式既粒粒，所以其實d牙都唔係太痛。反而係鐵線督到刮損比較痛。

到左今日終於拆箍！另外要讚一樣野，陳醫生診所係會準備好一個臨時固定器，再幫我拆箍。我一拆箍，就已經有有個固定器戴住。另外再整多個送比我。兩set固定器都省返錢。 醫生技術好，肯自己覆wtsapp，有耐性 ！設備齊全X光全部唔洗出去影！

今日拆埋箍，準備下一步做植牙。醫生要我拆箍之後，等4個月牙骨form好小小再做植牙。陳醫生真係所有治療都精通，全部都可以比到個準確答案，十分有信心！





簡評:
個人觀感- 醫術精湛、鉅細無遺
經歷過程- 求診病人實在太多，等候需時
推介意見- 已視為本人的必然選擇

陳澔賢醫生醫生- 尋醫經歷詳述:
我隻門牙越來越長，越來越鬆，朋友叫我快啲去睇陳醫生。陳醫生一坐低，睇到x光已經見到我D牙鬆曬，又問到我係食煙，長期唔睇牙。 你完全感覺到佢問得中point。

牙周病無左好多牙，通常大部份牙醫就會開始hard sell鑲牙植牙，因為好賺；陳醫生淨係叫我先處理牙周病。無左牙齒可以選擇用 普通假牙 或者 植牙選擇。叫我自己根據經濟能力揀，並且可以遲D做決定。牙周病成個療程18000，包脫牙。明明白白收費。
我立刻就脫左幾隻鬆牙，真係無痛。手勢超好！選陳醫生一定冇錯



簡評:
個人觀感- 醫術精湛、鉅細無遺
經歷過程- 求診病人實在太多，等候需時
推介意見- 已視為本人的必然選擇

陳澔賢醫生醫生- 尋醫經歷詳述:
我現時在陳澔賢牙科醫生處跟進我的牙周病，很理想，陳醫生和鄺洗牙師都很專業。
之前後牙牙肉持續腫痛了一段時間，睇開既牙醫話我有嚴重牙周病，需要做手術令我十分擔憂。但我半醒半疑，所以向陳醫生求診拿多個意見。

陳醫生向我細心解釋，由於我好耐之前缺了一隻大牙無補返，導致後面大牙嚴重傾斜形成了一個虛位藏細菌和食物，所以成日牙肉會腫痛。就算做手術都無辦法逆轉，讓我考慮脫除，其他牙齒的牙周病反而不太嚴重可以保留。我最後跟從陳醫生建議脫了那個大牙，因為最後大牙進食沒有太大幫助。 醫生亦都非常中肯，著我不需要補回那個牙齒了，因為牙骨流失。
之後我便接受了全口的牙周病治療，並且現在保持4～6個月就會覆診洗牙一次。治療過程是醫生負責打針，洗牙師負責洗。洗牙師鄺小姐我感覺比牙醫洗得更加細心，大概是因為洗牙師只專做洗牙和清潔的緣故！

很推薦在這裡進行大家牙周病治療和覆診


簡評:
個人觀感- 醫術精湛、鉅細無遺
經歷過程- 求診病人實在太多，等候需時
推介意見- 值得向有需要人仕推介

陳澔賢醫生醫生- 尋醫經歷詳述:
衷心多謝陳澔賢醫生🙏🏻因為工作關係到依家先整理好篇評論。
先講下自己嘅情況，2/7朝早無端端開始牙痛，食嘢都食唔到，食止痛藥後返工，發現係完全0作用，到夜晚已經痛到講唔到嘢（會lur下lur下咁），照鏡望啲牙肉又紅又腫，即刻上網search牙醫，因為想快啲搞掂，於是只係就近揀咗間區內嘅牙醫，而且有得wts預約嘅，就搵到陳澔賢醫生。
3/7前一晚痛到瞓唔到，嘢又食唔落，一心只想快啲解決。上到診所，好大好舒適，有別一般牙科診所，唔會有陣怪味同壓迫感，仲會播下音樂，氣氛令人放鬆。前台有幾位姑娘，態度親切友善，完全無發生之前睇到一個留言話佢哋黑面之類。照過電腦掃描，醫生檢查完話係智慧齒導致發炎，長遠嚟講建議我剝咗佢，如果唔係只可以靠藥物止痛消炎，但之後會定期返發。成個過程無強逼成分，陳醫生甚至直接講「你可以去第2個牙醫度剝都得架」，仲俾我坐喺出面慢慢考慮，因為價錢同我心目中有出入，我最終決定攞咗消炎止痛藥先再睇吓點。
過咗幾日，藥都就嚟食完，可以講到嘢同食到流質食物，但仍然未完全消腫，開始有啲擔心，於是嘗試wts陳醫生（去睇過一次後會主動話有咩問題可隨時詢問，佢本人亦會親自回覆），好坦白咁同佢講自己嘅情況，睇吓有冇其他方法可以解決。陳醫生了解我有經濟壓力後，竟然主動話收我平啲，完全係預料之外，原本只係諗住可唔可以打針消腫等等。唔係個個醫生可以咁有同理心，為病人設身處地去諗，呢位陳醫生真係一位仁醫，好多謝佢，應承咗醫生第時搵到錢一定要正價幫襯佢👍🏻
8/7終於要剝牙，心情緊張。做手術之前有個姑娘同我講解一下陣間會做啲咩，嗰位姑娘俾我感覺專業、爽手，個人已經定少少。陳醫生入到嚟再講多啲有關手術嘅風險，打咗3支麻醉針，叫我啷口嗰位姑娘好溫柔，剝牙過程中亦完全無痛，只見到陳醫生好用力咁「蚊」嘢同聽到啲機器聲，但一啲痛楚都冇。而且過程入面，姑娘會不斷叫你「放鬆啲」、「有痛就舉手呀」、「你陣間會聽到啪一聲，唔使驚下～」成程都安撫住個病人，望上去仲有部電視睇添。
14/7講返呢幾日嘅情況，剝牙當日，依足姑娘指示咬棉花止血，流血量頗多，所以換咗幾次棉花，診所都有俾定幾包棉花用作更換。麻醉藥退咗之後係有啲痛，所以等止血後食咗少少粥就食藥，食嘢盡量小心避開個傷口。手術後第2日聽姑娘話乖乖刷傷口位，包括認真啷口（診所有俾漱口水），痛都要刷，保持衛生就唔怕傷口發炎。第2日瞓醒傷口嗰邊面腫起一大舊，就係網上search都會搵到嘅剝智慧齒腫面樣，而且個口唔係好擘得開，都係少講嘢同食粥為主，陳醫生俾咗3日病假我在家好好休息。到第3日腫到最高峰，之後夜晚逐漸消退，第4日瞓醒已經幾乎全部退晒，就咁望落係唔覺有分別。
15/7拆埋線，過程簡單無痛，全程只係用咗1-2分鐘左右，望到剝牙位有個窿，姑娘有提醒只需要食飯後留意吓有冇食物殘渣跌咗落去，就盡量啷口整返出嚟。
9月近況: 咩都食得，完全冇戒口，牙肉到依家都冇再發過炎啦！
陳醫生手勢好好，剝牙後我總共只係食咗2-3粒止痛藥左右，而且喺術後醫生隔幾日就會主動wts問感覺點樣，真係好有病人心，再次多謝陳醫生🙏🏻


簡評:
個人觀感- 仁心仁術、醫德高尚
經歷過程- 醫生會從病人出發去提供意見
推介意見- 已視為本人的必然選擇