焦慮症疑病症

病患者女 - 35歲

自生完細女一年後，即今年3月開始有晚半夜醒來心跳突然好快，又有作嘔同急大便，加4肢好似發痳發涼無血到感覺後，斷斷續續又出現全身針吉感覺，由頭皮到腳，之後去睇醫生照左腦MRI，做埋神經傳導測試，報告無事，以為頸有事，照埋全脊椎MRI，有輕微頸椎間盤突出，腦科醫生認為唔會令到手腳痳咁嚴重，因為只係輕微退化突出，睇完醫生個心安落好多，慢慢d徵狀逐漸消失，但同時我食緊鐵丸因貧血，鐵太低，心諗其實會唔會因鐵太低引起，食左鐵丸所以慢慢無事，還是因為睇完醫生安心左唔係大病所以慢慢無事。每次身體有事我都不停上網睇病徵，會覺得自己中左，每次睇完醫生就會好安心，但跟住又出現第二樣野，而架又出現腸胃問題，好多胃氣，腸氣，全日不停噯氣放屁，呢幾日反而放唔到屁谷到下腹痛，已持續一個幾月，大便正常條狀但有白色黏液，胃成日飯後就滯住，食得落野，但飯後又會滯，呢幾日仲出現排便不清感覺，我又想去睇醫生，但知道一睇多數又會要照腸鏡胃鏡排除真係有病，但我本身有心律不整，我唔知又係咪情緒引起，因為我一緊張心就亂跳，我又驚照腸胃鏡會搞到心臟病發會死，呢排不停睇網上資訊我d徵狀又似腸胃焦慮症但又似腸癌胃癌徵狀，每日都好焦慮好低落，我唔知應該點做好，我已經成日睇好多醫生，但睇醫生都更係會有d事，好似以前心跳快，又真係check到有心律不整，頭暈耳鳴睇腦科佢又真係照到有個瘤，不過醫生話唔關個瘤事，而我做左腦手術切除個瘤，以前亦曾做過乳腺纖維瘤同卵巢瘤手術，唔知係咪咁所以身體一有小小毛病我就好驚，好驚又要做手術，對自己無信心，點解又係我有事。我諗我有埋驚恐症，搭飛機會心跳快到就黎死咁樣控制唔到，好驚搭飛機，但短途台灣個d又無發作。

好想問醫生，我而架到底應該去睇腸胃專科又要洗一筆錢去照還是應該搵精神科呢？我真的好怕自己有腸胃癌！同埋想問醫生我係唔係焦慮症疑病症呢？

多謝醫生抽空睇咁長篇，謝謝醫生解答。

張逸和醫生回覆: [ 13/09/2020 ]

你好Yuki，謝謝你的查詢！
根據您的描述，很大機會是焦慮症的症狀。

身體上的毛病，如果檢查過器官沒有問題，很大機會是和你的腦神經傳導物質(neurotransmitter ) 失調有關，例如血清素、去甲腎上腺素等等。大腦是所有器官運作的中央系統，如果出現了問題，當然也有機會出現了你一系列所描述的焦慮症狀。

正所謂病向淺中醫，你只需要盡快預約精神科醫生作進一步評估診斷和治療，就能輕易解決。是否疑病徵狀抑或是其他焦慮症，是需要一個比較詳細的評估才能解答到你所有的疑問，祝你早日康復！