經歷詳述:
黎睇呢位醫生已經係一段時間前嘅事，本身因為睇的症狀是比較私人的婦科問題而冇打上黎，但由於見到呢到幾個新comment，實在唔想再有其他人比錢比難受，都決定上返黎講返自己經歷。

1. 原來係有請打手，當初我是因此網站的評價普遍正面才特意去睇，但都發現評價幾兩極，現在看到部份留言指這位醫生原來有請打手，即時覺得難怪了。細心再睇先發現好評的內容其實都好空泛，但差評的都能描述診症的具體細節，所以大家都要小心留意此處的報告哪些才是真確的。

2. 有隱藏收費，見好幾個留言都有提及。我本來是因婦科問題去看診，要檢查私處是理所當然，但同樣也是到付診金時才知這個所謂的婦檢要額外收費$200，而周醫生及診所姑娘在事前都未有聲明。而這個額外收費$200的所謂婦檢呢，全程5分鐘都唔知有冇，訓上床比佢望一望，挖一挖問你呢幾個位痛唔痛就完左。而且有個難受嘅位係呢位醫生伸手入我私處檢查時，並非先知會比病人有心理準備，而係一邊塞手指入黎一邊冇好冷漠地講左句「宜家幫你檢查可能會有d唔舒服。」但講緊佢係一邊塞一邊講呢句！這並不是知會！相信女士們都能想像咁樣係幾唔舒服，而且最後連埋佢個隱藏收費收左我七百幾蚊，咁我不如一早去睇婦科好過？起碼真係有專業全面嘅「婦檢」！

3. 見也有不少人提及候診時間問題。我睇左呢位醫生兩次，兩次黎都係一個人都冇，但兩次都係唔知點解要等十幾分鐘才能入去睇。公道d講，第一次去睇佢都覺得正正常常冇乜野，又係女醫生，先會第二次都再去睇。第一次睇時有提及過因工作問題經常要忍尿冇得去廁所，第二次去睇係拎左病假，問佢開醫生紙，堅持唔開，話因我兩次嘅問題唔同，冇得去廁所唔會係今次嘅病因，而且覺得唔會影響到我工作能力。本身以為佢比人呃得假紙多先會咁起鋼，但睇完幾個真實評價先知可能佢性格就係咁。當時嘅感覺真係覺得呢位醫生好唔體諒人！我私人部位有不適，都不可以請病假休息嗎？而且我相信無論邊種婦科問題都好，忍尿或多或少都有點影響吧？我攞日病假調節自己作息及去廁所嘅狀況，點都會有幫助吧？但呢位醫生就是企到極硬，唔開就唔開。當時姑娘都面有難色，可能佢都見唔少呢位醫生同病人嘅衝突？雖然不是傷風感冒發燒那類傳染性疾病，但有婦科不適都係好需要休息，大家都係女性，佢竟然可以以「不覺得會影響工作能力」而作此決定，真係好無奈。

醫生是份需要德性的工作，很遺憾在這位醫生身上實在感受不到對病人應有的關顧，有高昂又不合理的隱藏收費亦是不可接受的。仲要請打手作comment呃人，我當初都係比呢d comment呃左。希望如有其他人有類似經歷都真係要分享，唔好再比其他人受害。講受害真係唔誇張，嘥左咁多錢，仲要換返咁難受嘅感覺，真係好差！


簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧