經歷詳述:
20年3月發現右腦前額葉有6cm的腦膜瘤，MRI初定為良性，3月16日第一次去見馮醫生，醫生清晰講解左個瘤的情況，包括瘤的位置、大細、造成的影響等並做左d肢體的測試。馮醫生係我入診室之前已經準備得好充足，所以好快就話到俾我知手術方案、大概要住幾耐醫院、手術後可能岀現的後遺症、要食咩葯同大概食幾耐、休息幾耐可以恢復工作等等。因為解釋得好清晰所以我剩係問左馮醫生幾個問題：係唔係一定要開腦，有無得微創？可唔可以完全切除？復發機率同是否良性？馮醫生的回答簡而精，但句句話都中point，如果好肯定的佢先會講，唔肯定的佢會實事求是，唔會估估下，例如是否良性，佢只係話睇片係但化驗過先可以確定，所謂權威就應該如此。馮醫生俾到我好大信心，好放心將個手術交俾佢！
最後21日做開腦和切除腦膜瘤手術，做左4個鐘(因為瘤太大，要慢慢切除)，清醒之後我無特別唔舒服，只係覺得好餓同好攰，無頭暈無嘔，傷口亦唔痛，連止痛藥都無食，但為安全要住一晚ICU。第二日我轉去普通病房之後已經可以坐起身，第三日醫生鼓勵我嘗試落床，並且恢復正常飲食，第四日我已經可以完全自理，包括去洗手間同沖涼刷牙洗面等。一個星期後馮醫生親自幫我拆線，個傷口處理得好靚，切口好直，縫合對皮都好齊，只見到好幼的一條分界線，亦無剪我太多頭發，真係做到佢講個句“包靚”！
之後傷口不用包住，也不用換藥，但不能濕水。前後差不多10日出院，成件事都好smooth，亦無俾我太多痛苦。回家第二日我已經可以戴帽出去行下街了，真係好多謝馮醫生，佢用專業、細心同仁德幫我好快咁醫好左個病。佢完全俾到我信心，而出嚟結果亦如佢之前嘅承諾一樣！咁高嘅醫術，收費亦唔貴，而且好的主刀醫生，佢合作嘅團隊一定唔會差，麻醉醫生都處理得非常好，將我嘅痛苦減到最低，我非常感恩可以揾到馮醫生和他的團隊幫我！如果不是馮醫生我無可能康復得咁快！就算俾我揀多次，我依然會選擇請馮醫生幫我！
簡評:
個人觀感- 醫術精湛、鉅細無遺
經歷過程- 醫生會清晰明確的講解其病情
推介意見- 已視為本人的必然選擇