經歷詳述:
大約2個月前我受到肩膊痛影響, 活動能力受到好大限制, 最慘係一瞓落床就開始痛, 痛足成晚, 根本冇可能瞓得著, 睇西醫話唔似五十肩,照咗MRI, 報告話右肩旋轉肌撕裂, 4月尾痛到入急診室之後上埋病房,畀咗報告醫生睇, 但顧問醫生問主診醫生點解A&E收我入院, 我聽到個心冷咗一節, 仲叫我舉高手畀佢睇, 我慢慢張右手向上舉起, 佢話我都可以舉到手, 我同醫生講好痛痛到瞓唔到,仲有左手手指屈伸好困難, 佢走埋嚟張我十隻手指逐隻向上拗,拗到右手尾指, 痛到慘叫 ( 因我知呢隻尾指條筋可能有事, 痛咗一段時間 ) 跟住醫生們就離開, 冇再作任何檢查, 只係剛上病房時有位實習醫生幫我做個簡單檢查及有另一位駐院醫生check過, 抽血量血壓, 晚上食止痛藥都止唔到痛, 第二朝到另一位醫生巡房, 問我情況如何, 我答好痛瞓唔到, 佢話你隻手都舉得起, 或者佢地用呢個標準去診斷病人嘅病情是否嚴重, 我由入院到出院係完全唔清楚自己嘅病情, 到底撕裂有幾深, 有乜嘢後續治療完全冇講解, 我要求出院, 醫生好爽快一口說好, 開藥轉介物理治療. 當下心情好灰, 因我知喺醫院做物理治療效果唔會太理想, 佢地多數做10次左右就算完成一個療程, 之後等覆診,加上排期可能冇咁快, 我直接出私家做, 雖然有所改善, 但仍然痛尤其是晚上, 睡眠質素受到嚴重影響. 終於決定去睇李文輝醫生, 李醫生係我幾年前係公立醫院睇過我幾次嘅骨科醫生, 對李醫生印象非常深刻, 佢好耐心去聆聽我訴說自己嘅病情, 檢查又細心, 睇完李醫生後心情都輕鬆咗, 要應付每日大量嘅應診病人,仍然能保持呢種對病人嘅專業態度, 實屬難得,可惜, 之後李醫生已投身私人市場, 而從其他病人口中得知李醫生所做嘅手術都非常成功,好完美, 有換咗膝關節嘅病人同我講, 佢做完手術後好快可以落床, 冇乜唔舒服, 不停讚李醫生醫術了得, 好手勢. 再問番診所啲姑娘, 個個都盛讚李醫生, 因為啲病人手術後番嚟覆診, 個個傷口都埋得好靚, 冇乜手術後遺症, 但我個心一沉, 心諗即係又冇咗一位好醫生睇我地啲小市民, 因為之前係李醫生負責跟進我呢個case睇膝蓋嘅 ! 喺痛苦煎熬下, 腦海突然諗起李文輝醫生, 立即打去booking, 終於見到李醫生, 佢當然認得我呢個叮噹身形嘅病人, 身體上嘅痛苦已經即時減去3份1, 接下來足足用咗成個鐘頭幫我檢查, 仲發現多一個病灶, 就係網球肘,即時幫我注射 steroid 以解決嚴重嘅酸痛問題, 再開消炎止痛藥同藥膏,李醫生依然咁細心, 臉上更多了笑容, 好可能喺以前醫院工作壓力太大, 做到骨科副顧問醫生當然責任重大啦, 而家反而係直接面對病人, 冇乜行政工作, 對病人嚟講係福氣. 最後, 睇完醫生當然要畀$啦, 姑娘同我講,醫生畀咗個折我, 當堂好感動真係唔識點講, 能夠揾到一個好醫生有醫德有醫術嘅醫生, 我覺得好幸運連心理上都覺得病情舒緩咗好多 ! 多謝您 Dr.Lee
簡評:
個人觀感- 仁心仁術、醫德高尚
經歷過程- 醫生會主動探索其病因及治療
推介意見- 已視為本人的必然選擇