經歷詳述:
每兩年例行身體檢查發現乳房有硬塊新增，唔想用診所推介嘅女醫生……我認我性別歧視，相信揸得手術刀，都係男性外科醫生好啲，上網搵到馬醫生，見佢喺乳腺科浸咗好多年，又見有瑪麗醫院病人推薦，最重要醫生年紀唔係大，醫學知識一定與時並進，打電話預約，醫生知道我粒嘢有4-5cm咁大，就叫我第二日立即見佢……我好淡定，以為自己一定冇事，點知醫生睇完我啲報告及X光照片，話我粒嘢邊緣唔係咁清晰（其實就算清晰都唔一定冇事）加上報告寫我係 BI-RADS4 即係有可疑 >2-95% 係嗰味嘢（當刻想爆粗，卓X個醫生同我講話個報告冇“衰嘢”，唔使擔心，只係提議搵醫生抽針，等我重隔咗三個月先行動）醫生話要抽粗針化驗，嗰刻真係嚇到差啲喊。過隔離治療室，醫生幫我照超聲波，圖像射上天花板，方便睇到自己病情。抽粗針，聽到都嚇死，但醫生手勢真係好好，一啲都唔痛加上姑娘很體貼，過程中醫生，姑娘同我吹下水分散我注意力，好快就抽完。第二日已出咗報告，係良性葉狀腫瘤，因 size 大及有血管在內，醫生提議開刀切除整粒化驗，醫生詳細講出手術過程及影響範圍 ，疤痕位置……等手術後情況，並提議做“冰凍切片” 檢查，以確保完全切除唔使番刀。當日手術順利之餘, 傷口真係唔覺痛。返馬醫生診所覆診, 醫生為我用超聲波檢查及洗傷口, 絕對唔會馬虎. sis 們最緊張條疤痕, 正如下面幾位用家講, 收藏在乳暈根本唔顯眼, 我就麻煩D, 因粒嘢位置比較高, 要打直開多一小刀, 但疤痕很幼細。總結: 馬醫生醫術&手術精湛, 刀法一流, 待人親切細心, 收費非常合理。
（其實，我點解寫得咁長編，除咗讚賞馬醫生外，亦因為睇咗呢個網站以下幾編醫評後作最終決定，所以要作出貢獻)
簡評:
個人觀感- 判症快捷、合情合理
經歷過程- 醫生會清晰明確的講解其病情
推介意見- 不可多得，值得等待