請醫生解答

病患者女 - 24歲

妳好醫生我想請問我自小就係一個家庭暴力既環境長大直至七年前我被爸爸打到我再承受唔住搞到上差館然後自己搬左出黎當時只得十七歲既我一直身邊只得當時既男朋友陪住果段日子過得好痛苦連鐵皮屋都住過我未搬出黎前因爸爸既影響下我既情緒一直好波動好易就大叫大喊由其係被打既時候真係好似癲左一樣。

到搬左出黎一直我都好掛念家人每晚都喊到訓著維持左差不多一年至平伏了下來後來就開始對男朋友好大疑心我都發覺自己疑心比正常人嚴重好多好多直到依家都係咁呢幾年男朋友我都已經交了幾個但每一個都因為我既疑心而經常嘈交當然其中因為經歷過背叛使問題更嚴重。有時我仲會將一件好小既事諗到好複雜好似對方一早計劃好點去講大話呃我咁。呢七年除左身邊最親果幾個人之外我都唔敢打電話接電話就連叫外賣都唔敢一聽到電話響就好驚呢個情況已經七年了到依家都解決不到直接影響到我正常既生活所以我只有打訊息跟別人聯絡！

而且近來我失戀情緒更一發不可收拾已經過了兩個月都仍然控制不到情緒日日喊晚晚失眠什至試過連續兩日沒訓過明明好累但就唔知自己驚慌乜野而訓唔到雙腳一直扯到好緊好酸痛反而要用力放鬆咁由其係想訓既時候。
我同這個男朋友係同居的但因為接受唔到男朋友呢份新工沒時間陪我因為佢一番左工就好多個鐘訊息電話都唔覆當我搵唔到佢我就控制唔到自己大喊又不自控發癲所以我提出分開但分開我又接受唔到反而令自己更失控！
呢段時間我靠飲酒至訓到而且成日想自殺我並唔係因為撒嬌至會咁係我唔知點解我搵唔到佢就失控係咪因為我身邊只剩番佢一個所以我至會咁？還是我真係有病？
我一直失眠係真的我唔係扮既但當佢係我身邊我就訓到教點解會咁？

呢段時間除左失控日日喊失眠雙腳扯緊日日喱係屋企沒番過工連野都可以唔食唔會肚餓仲有想自殺之外當嘈交/激動時會頭暈有時仲會喘氣總之好唔舒服
未失戀前我已經會沒啦啦成日諗唔開心既野搞到喊又會幻想d屋企人死左之後自己係度喊但唔係我特登去諗的！

我真係過得好辛苦好痛苦醫生請問我係咩病？
同埋因為我兩個月番唔到工了我真係好需要妳既幫助我上網搵唔到妳的實質收費可以話我知大約要幾錢嘛？
如果價錢我承擔得到我想盡快預約因為我怕我真係控制唔住就跳下去..

希望能盡快得到回覆感謝！！

張逸和醫生回覆: [ 10/17/2016 ]

妳好NANA, 謝謝你詳盡的描述和查詢。其實每個人嘅童年經歷，對日後成長時的個人發展有很大關連，包括情緒、性格、人與人之間嘅信任、壓力管理、處事方法和自尊心等等。
你現在出現的是抑鬱和焦慮的徵狀，和你童年的經歷是環環相扣的。藥物配合心理治療是最為關鍵。望你能早日找到適合的醫生，解除以往的枷鎖，助你早日康復，重投社會工作，活得比以前更加美好和精彩。

關於收費和預約，煩請聯絡我的姑娘以作查詢和核實。謝謝！

張逸和醫生上

以上資料只供參考，不能作診症用途，
請與家庭醫生查詢並作出適合治療。
如有身體不適請即求診，切勿延誤治療。
若資料有所漏誤，本網及相關資料提供者恕不負責。