經歷詳述:
半年前耳仔噗噗聲，鼻孔發炎，當時睇左另一位耳鼻喉專科醫生，佢話鼻入面「可能」有金黃葡萄球菌，耳仔就睇唔出有咩問題，俾左啲消炎藥同止暈藥我，之後都無事。
半年後今日症狀完全一樣，上網睇左葉醫生啲評價都驚驚地，有好多都話葉醫生又惡又無禮貌，都有人讚葉醫生好有醫德，傍晚打電話去約第二朝早都有位俾我睇，由於鼻又痛，耳仔又噗噗聲，於是硬住頭皮去見葉醫生（基於網上評價，提醒自己講重點，醫生無問就唔好講）。
診所病人唔多，我前面有2位病人，睇完之後再有2位病人（聽到姑娘話醫生早上有6位病人，下午有7位，仲未計一直有電話打黎約睇）由於人人都準時到診所又有預約，所以診所有足夠位置俾病人坐低等入房。
第一次見葉醫生，已經表現出佢既風趣幽默，不但全程笑容滿面，仲同我談笑風生，我精確也說出病情，葉醫生一問我一答，都足夠我講晒要俾佢知既詳細病情，葉醫生同我做左幾樣測試動作，檢查並證實係肩頸因枕頭太高而引致發炎，所以會令耳仔噗噗聲，鼻孔發炎與耳仔無關，仲叫我放心，耳仔內無異物，腦部亦無問題，開左藥膏俾我搽鼻孔，消炎藥，胃藥同止暈藥，我多口問駛唔駛轉介去睇骨科或者頸椎專科之類，葉醫生話「唔駛，我都無叫妳去睇」語調雖然有些輕佻但肯定無惡意，之後詳細教我食藥，語重心長提醒我要飽肚食。
整體而言今次睇醫生既過程十分輕鬆愉快，希望食完6日藥會完全康復。
簡評:
個人觀感- 健談友善、感覺良好
經歷過程- 醫生會主動探索其病因及治療
推介意見- 已視為本人的必然選擇