經歷詳述:
牙醫欠缺專業知識與技術，推諉責任。唔想再有人中伏，所以詳細講自己嘅經驗:

２０２２年年尾喺呢間診所做植牙，２０２３年６月３日完成整個植牙過程後立即發現牙冠明顯搖動，牙醫表示啲骨未生實，叫我再等下。後來隔一星期發現情況無改善，再去牙醫度問係咪代表植牙失敗，牙醫口口聲聲話唔係失敗，仲話係因為懷疑我夜晚有磨牙習慣先令隻植牙搖動，並建議我戴住固定器訓教。後來牙醫就放大假，由７月至１０月４日完全唔見人，期間打去診所無人聽，診所亦無開門，無留低任何聯絡方法。

７月頭去睇另一個專科牙醫，照完CＢＣＴ先發現牙樁放錯位，竟然有一半係無骨覆蓋。專科牙醫話原因好大機會係個牙醫唔夠技術，事前亦無做足準備功夫先搞成咁。隻植牙基本上係失敗，需要重做，否則牙樁搖動會引致發炎，到時更加手尾長。

１０月７日終於等到牙醫返嚟，佢第一時間推搪，話係我自己啲骨收縮。請問６月３日至７月頭呢短短一個月，牙骨會收縮到令大半枝牙樁變成喺骨嘅上面？我問牙醫點解安裝牙冠之前唔係確保牙樁無問題先安裝牙冠？牙醫表示無辦法睇到。咩叫無辦法？好簡單照一照CＢＣＴ已經睇到枝樁有無放錯位，但懷疑呢位牙醫趕住自己７月放大假，結果就６月草草了事求其裝埋牙冠收埋尾數就打發我走。我都已經無要求佢賠償，只不過問佢可唔可以每半年返嚟請佢幫我檢查下睇下有無問題，佢都唔肯，話咁耐之後嘅期俾唔到我。咩叫俾唔到期我？我而家講緊半年後喎，唔係叫你聽日臨時臨急幫我睇喎，咁都俾唔到期？

成個植牙收咗足足三萬蚊，出面專做植牙嘅專科都係三萬左右，既然又無專業知識同技術，又無責任感唔肯跟進病人情況，憑咩收咁貴？真心勸大家唔好再俾錢呢啲無良牙醫賺，特別係植牙呢啲對技術方面要求咁高嘅小手術，真係出去搵專業、有信譽嘅牙醫做，唔希望有人好似我咁，後悔莫及。

簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧