經歷詳述:
因為近屋企，所以舊年12月揀咗喺青衣菁薈牙科做隱式箍牙，定時定候都要返去複診，每次都乖乖哋約好時間並準時出現，但每次去到都要等起碼一個鐘頭以上，簡直係惡夢！！

有一次我專登約佢哋lunch time之後第一個time slot - 14:30，我準時到達，點知同場仲有另一位病人同樣係約咗14:30。一個時段最少擺3個booking，而謝醫生14:50先慢慢拎住杯咖啡行入診所，等佢換埋衫都已經14:55，而當時約咗14:45同15:00嘅幾組客人都已經陸續到達：）真係每次都等到好躁底！！

今次複診仲離譜，我約咗15:45複診，15:00出咗門口，行行下收到診所個電話，姑娘稱謝醫生突然有急事要出去，可能要16:00先返到嚟，問我可唔可以改下星期六⋯⋯我本來就係因為下星期有事先提前個複診，所以佢安排我最早嘅時間 - 16:00複診，結果我一直等到16:45都未見到謝醫生。

最後我被姑娘告知醫生可能17:00都未返得切嚟，所以叫我都係再約。姑娘一直同我講唔好意思⋯⋯

簡直係浪費時間並且極度唔尊重病人！！

如果唔係箍牙療程好難中途換醫生，我一定唔會再繼續，而家洗濕咗個頭，焗住繼續搵佢複診。其他人請自行斟酌！！

簡評:
個人觀感- 態度有失、醫德有損
經歷過程- 求診病人實在太多，等候需時
推介意見- 可能人夾人緣自己衡量