經歷詳述:
大概一年半前發現左耳珠底部有一粒類似初起暗瘡的小粒，無特別處理下，近月開始變大得像恤衫鈕般的立體圓粒。先到公司醫保旗下的卓健普通科門診求診，普通科醫生建議切除，寫轉介信到耳鼻喉專科。由於是卓健集團，同日已有卓健人員來電跟進，建議旗下專科醫生及安排預約，在無相熟專科醫生及貪方便下，就安排了逢星期二上午會在尖沙咀亞太中心診所的馬漢光醫生。
第一次到診時，馬醫生只望了粒瘤一眼，就話：你都想割咗佢㗎啦！就叫姑娘了解下我張醫療卡批唔批到手術費，姑娘話等批，要1，2日。醫生就叫我先自己比按金，等醫療卡批到就會全數退回。我主動問如果唔批呢？至知咁就等如同意自己比錢。咁我話唔好啦！等批咗我先再嚟啦！馬醫生望都唔望我，就面黑黑將啲文件比返姑娘。由於轉介信已比咗呢間專科診所，所有手續唯有繼續。姑娘跟進態度正常良好，過幾日批咗，我再去見醫生，見到馬醫生時，佢第一句係問我邊隻耳仔？心諗，上次病歷無記低？答完左耳就叫我上床打麻醉針，但無問我有無藥物敏感，連姑娘都未入嚟，就叫我自己用手反起耳珠㩒住，方便馬醫生落針。之後姑娘先入嚟擺放所須工具，呢段空檔，馬醫生極速講咗句：呢個手術得2個風險嘅啫…傷口發炎同埋可能割完再番發。我即刻問：驚發炎即係不可濕水？佢先至答我唔得。我禮貌地問咁點洗頭？佢叫唔好洗。我問咁要幾耐唔洗？佢又話同你貼張防水膠布啦！即係無正面答我問題。
好快馬醫生就開始動刀，完成後只叫我一星期後覆診，同埋話開消炎藥抗生素，其他咩都無講解。
包括：我傷口縫咗4針。
一星期後覆診時……
睇情況是否須要洗傷口。
可以拆線未。
化驗報告內容。
以上全部都係姑娘講我至知。
綜合2次經驗，只覺得馬醫生好趕時間，嚟緊覆診我亦唔會抱咩期望，只能自求多福！
簡評:
個人觀感- 態度有失、醫德有損
經歷過程- 診証時間極其急趕，快來快去
推介意見- 本人絕對不會再作光顧