經歷詳述:
我諗咗好耐，好唔好寫呢一個評語，因為睇完呢位醫生之後我真心嬲到喊，亦都唔想再唸返呢件事令自己唔開心。不過我唔想有任何姊妹喺病緊嘅情況之下遇到呢位醫生，所以決定要同大家分享。

之前睇咗兩個婦產科醫生都有唔同發現，所以經朋友介紹決定去搵王予婷醫生檢查同睇下有冇更多發現。席間我向王醫生解釋自己已知的病情同之前兩位醫生有咩發現，話佢知今次搵佢希望等佢幫我再做一次檢查。當我同王醫生解釋病情嘅時候，佢不單止用目中無人嘅眼神望番我轉頭，再對自己個姑娘恥笑，完全無視咗我所講嘅說話。佢嘅重點唔係想去幫我，係想話我知我用既詞語係錯誤。講到咁上下佢開始唔耐煩，同我講: ”其實我出邊有下一位病人等緊,你可唔可以出返去先？” 我喺約定時間早到， 等到約定時間後45分鐘先見到醫生，我都冇怨言，明白每一位病人都需要一定嘅時間去了解自己嘅狀況。我最後冇同佢辯論，出左去等。過咗30分鐘左右，叫我入去做陰道超聲波。自問都做過無數次超聲波，今次係最痛，最唔舒服嘅一次。但係我都安慰自己同自己講，醫生可能想照清楚啲，要忍住。照完之後同我解釋: “照到唔知左邊定右邊有問題”，咁我問清楚佢其實係左邊定右面有問題，佢嘅回答係”照到左或者右有問題都冇乜所謂。” 到呢一刻我已經唔想再同佢有任何嘅對答。

本身其實已經好無助，有病在身，想知究竟發生咩事同埋有咩要迫切去做。換來嘅係一位冇禮貌，唔識尊重人嘅補習老師，去糾正我用嘅詞語。病人理解有誤，一位好嘅醫生係應該慢慢解釋返俾個病人知佢嘅專業意見。我喺王予婷醫生身上，所得到嘅只有不尊重，不專業，不知所謂嘅診斷。

佢最後話如果你想喺度follow up咁你就要將你個case轉過嚟，我諗佢言下之意係如果我想佢follow up就唔好再搵其他醫生。其實作為一個病人，對自己病情擔心想聽多個人意見實屬人之常情，但王醫生對我嘅病情同病人心理不屑一顧，實在令我百思不解，十分憂慮。我個人唔會再搵佢，不過希望王醫生對其他病人可以給予更多關懷同俾少少時間去了解下病人心理需要同有咩擔心，唔好掛牌只為賺取診症金。
簡評:
個人觀感- 態度有失、醫德有損
經歷過程- 醫護之語調態度令人無所適從
推介意見- 本人絕對不會再作光顧