經歷詳述:
本身1月3號朝早同下就搭巴士果陣已經反胃同埋唔舒服， 去到夜晚7點左右個人好虛、 企唔穩、完全無胃口。一開始唔知係肚痛， 肚附近覺得有舊石頭壓住左咁，就無理諗住早d訓會好。 點知夜晚11:30 開始就肚痛一直來回廁所。 因為腹瀉唔方便去太遠睇醫生， 就試下睇呢間係屋企附近既診所。
1月4號由9點營業時間開始打到9:15 am, 睇診時間已經被安排到去11:45am 。係睇醫生前， 已經去左第10 次廁所。我忍住便意， 去到診所見到勁多病人等緊， 都知要等一陣。 最後， 等左半個鐘先睇到醫生。 入到去， 醫生問左有關病徵、 藥物食物敏感、 過去病歷、 以往既腸胃檢查結果 呢類問題都無咩野， 之後佢有望我眼皮底同埋條脷， 然後講左句「都幾精神呀」， 就開始有趕客既態度。佢坐低就話 「我都唔知你咩事嫁啦， 不過都係果d 原因囉， 一係就腸胃炎， 一係就食物中毒」。 聽到呢到， 其實已經唔太好受， 加上佢講左幾次話 「得啦， 你走得啦， 拜拜」， 完全覺得佢係認為我係入黎呃醫生紙、病假紙。 佢問我仲有咩問題要問， 我問到係咪要食粥/泡飯果類， 佢話 「食固體類就得啦， 食飯， 你鍾意既， 煎條魚都得啦」， 然後佢又再揮手示意叫我出房， 又再叫我走。 出左房， 我先記得要攞病假紙， 我提出要2日病假（1月4-5號）， 醫生即時反應係 苦惱同埋表示唔願意， 我指出我要不斷走廁所係好麻煩， 佢最後就話「算啦算啦， 得啦， 俾你啦， 走啦， 拜拜」。攞左病假紙之後我發現，醫生連病因都無填。 我就即刻番去診所麻煩姑娘要佢填番。

以面診黎講， 作為一個病人， 我只係感受到不被尊重同埋不斷趕我走既態度。 我唔清楚係咪真係好多人係呢間診所呃病假紙， 但我連訓都無訓過就一直走廁所，亦都忍住便意去等， 唔認為要得到呢種看待。 而因為我考慮到搭巴士路程（超過1個鐘）、 工作環境所以想要2日病假亦都唔認為係呢個要求係過分。而病假紙連原因都唔填， 唔通要病人自己填？ 另一方面咁諗， 佢可能好既地方係會詢問多d問題，但呢樣野係醫生問診應該持有既態度吧。

以藥物效益黎講， 佢俾左胃藥、止肚痛藥、益生菌、同止屙藥我。 唯一好既地方可能係佢無亂開antibiotics。 而我睇完醫生當日只食左胃藥、止肚痛藥同益生菌，但都繼續屙， 屙到夜晚已接近20次， 我就臨訓前食左止屙藥， 不過我訓果陣依舊都要走廁所。直到我而家， 即係睇病後既第二日朝早（1月5號） 我都仲屙緊。止屙藥成效唔大。

整體黎講， 醫生有先入為主嘅觀念， 對病人既態度唔友善；藥物既成效弱；面診時間超出預約時間30分鐘。 絕對唔會再有睇呢個醫生既機會。

簡評:
個人觀感- 態度有失、醫德有損
經歷過程- 只知取藥付費，未能盡釋疑慮
推介意見- 本人絕對不會再作光顧