經歷詳述:
今日到李醫生診所睇病。其實我都唔係第一次睇，好幾年前已經開始睇。我覺得醫生本身OK嘅，但護士嘅態度，就真係唔OK！

登記處有兩個護士，年長啲嗰位姨姨態度友善，登記時亦有禮。但比較後生同大隻嗰個，就真係不敢恭維。

攞藥時，護士俾三盒藥膏我搽。因為我身上有兩個患處，分別在手和臉。我見頭兩盒都有清楚寫明搽喺手/臉上，而第三盒無寫，只係寫咗個「痛」字。

基於我唔肯定第三盒藥膏，應該搽喺手定臉上？(因為我擔心有些藥膏只能搽手，不能搽上臉。)

我希望了解清楚一點。我就問護士，第三盒藥膏係可以搽上臉？定係只搽手？

估唔到我一個咁普通嘅問題，會令個護士即時「著火」。

佢語氣好差咁同我講：「上面咁清楚寫個 痛 字，你都仲要問？」

吓？！我當時心諗，我係咪問錯問題，或者得罪咗佢，而我自己唔知呢？

其實，真心被佢嗰吓嘅語氣，同突如其來嘅惡劣態度，嚇到呆咗一呆。

我都驚 係我自己問得唔清楚，於是再心平氣和咁解釋俾佢聽。因為我有兩個患處，所以想了解清楚，第三盒藥膏，係搽喺邊個患處。

點知個惡護士答返我：「我唔知架！我只係負責讀返 藥膏上寫嘅嘢！」

咁我本身視力正常，對眼都睇到字嘅。只係有啲資料，無寫喺藥膏上，而我想知清楚少少啫。

個病人只係想了解多少少使用藥膏嘅資料，只係咁簡單。但無諗過會得到如此無用、離譜的回覆，更換來如此無禮的對待。

隔離護士姨姨目睹成個過程，佢就好好人咁同我解釋返：「其實係搽任何患處 都可以。」

YES！即時明白哂！

我需要嘅，其實咪就係一個咁簡單、咁直接嘅答案！趁惡護士行開去找錢時，好人嘅護士姨姨仲叫我「唔好介意」。

唉~我想提醒各位考慮睇李祖祺醫生嘅人，心裡面有咩問題，記得千祈唔好問啦。

因為所有嘢，已寫哂喺啲藥嘅包裝上面。

其他問題，
一概係唔可以問！
唔俾問！唔准問！唔問得！
除非你嗰日好想被人鬧啦！

完！
簡評:
個人觀感- 普普通通、中規中距
經歷過程- 醫護之語調態度令人無所適從
推介意見- 可能人夾人緣自己衡量