經歷詳述:
喉部間歇出現異常分泌, 先後睇過兩個專科醫生。 第一個同我照完內窺鏡, 話喉部有兩個囊腫,可以割咗佢, 不過手術要全身麻醉。問佢囊腫嚴唔嚴重, 有冇需要割, 答案模稜兩可。問佢手術費, 一個禮拜後姑娘回覆, 要四萬。

為穩陣計, 睇多一位醫生問下。 嗰位醫生好出名, 但聽完我講述病徵後係咁意望咗我口、鼻同耳仔, 跟住話就咁睇冇乜嘢, 要去佢私人診所照內窺鏡至睇到多啲, (我當時係睇保險名單內的集團診所)。我因為之前照過, 唔想再照多次, 於是話佢知我其實照過, 醫生話有囊腫, 想向佢問攞second opinion。 佢一聽面色變晒,話人哋既診斷佢唔會畀意見。 我話只係請教佢專業知識, 囊腫有冇病變可能, 有冇需要割。佢好串咁話: 問我專業知識即係要教書, 診金唔包喎！ 結果錢就使咗(雖然係保險畀), 連喉部囊腫有冇需要切除呢個簡單問題都唔肯答。

今次好認真想搵一個有醫德的醫生睇多次, 最終搵咗劉醫生。佢好認真聽晒我陳述的病徵, 先用簡單工具視診, 期間叫姑娘幫我查詢保險涵蓋範圍, 知道保險會cover, 就幫我照內窺鏡。照的時候好細心反複多次睇晒所有部位, 一面睇一面講解, 比第一位醫生仔細同詳盡, 結果都係話只有囊腫,　但囊腫的數目唔止兩個, 而係好多粒，除此之外冇其他問題。我問佢囊腫需唔需要醫治，佢好清楚咁話對健康冇影響，唔需要處理。至於我喉部出現的異常分泌，如果牽涉食道，應找腸胃科診治。劉醫生畀我感覺係好認真仔細地檢查同診斷，有問必答，講得清晰明確，亦好顧及病人的費用付擔，唔會叫病人做不必要的治療（例如冇必要的手術）。我好慶幸最終睇到劉醫生，佢既專業態度令我對醫生有返信心。

簡評:
個人觀感- 醫術精湛、鉅細無遺
經歷過程- 醫生會清晰明確的講解其病情
推介意見- 不可多得，值得等待