[ 眼科 ] 普通科醫生建議睇眼科

不知所謂的醫生，毫無醫德，濫收檢查費。完全不專業，只想你做手術收多啲錢。
因為生蛇，所以普通科醫生建議睇眼科，睇吓對眼有冇因生蛇而影響到發炎
之後醫生建議一連串嘅檢查，主要係針對白內障。由於爸爸對上一次檢查已是六年前，所以我認為都應該要再做一次檢查，頭兩個檢查佢都有講幾錢（total $3000)，最後一個佢無講，我地以為已包括，但原來要另收$800

1. 白內障評估 （以為係合理，原來係荒謬）
2. 黃斑病評估（合理要求，因病人年紀大）：結果無病變
3. 視神經檢查（鄧醫生做完黃斑病評估就話我爸爸有青光眼，要做多一個叫視野圖，但係呢一個視野圖只可以做咗白內障手術之後先至做，因為而家晶體白化遮住咗做唔到；咁佢就叫而家做咗個視神經檢查先）

最後問咗鄧醫生做白內障手術嘅收費，佢繼續說服我哋，話我爸爸白內障都嚴重，叫我爸爸快啲做。佢俾咗老花+散光晶體嘅價錢我哋(total~$6xxxx兩隻眼)，然後我爸爸問佢有冇得平啲，佢就用一啲好唔耐煩嘅語氣同我爸爸講「單焦晶體每隻眼平1萬，但係之後要戴眼镜，咁你係咪想戴眼鏡啊？」由於係手術，價錢亦都唔平，好合理地我同醫生講要返屋企同屋企人商量下，跟住佢就黑面，擰轉頭對住部電腦喺度打字，再冇望過我同我爸爸，我要主動問返佢咁我哋今日係咪冇藥水拎無藥要食？係咪可以走得？佢就話「唔做白內障都要補返視網膜穿咗嗰個窿先」咁我又問幾錢，要$7xxx。當然，我哋都係無立即決定做任何手術。

兩日後，我哋去咗睇另一位眼科醫生，俾埋當日檢查既報告醫生睇：
1. 白內障評估：醫生話「呢一份唔係報告，係要做白內障手術之前選擇晶體/度數嘅時候先需要做嘅評估」；白內障用普通驗眼嘅儀器已經睇到，並沒有有什麼特別檢查係需要做。喺我哋冇同意做白內障手術嘅情況底下，鄧醫生要求我哋做呢一個評估，其實根本就不需要）
2. 黃斑病評估：無病變
3. 視神經檢查：我唔記得醫生點講，但係醫生就話視野圖其實係喺未放大瞳孔之前就可以做到，同個白內障冇乜直接關係。即係鄧醫生講緊大話，點解做唔到視野圖檢查，係因為我爸爸已經放大咗瞳孔去做其他檢查；如果做咗視野圖檢查（數星星）可能唔使做視神經檢查
至於視網膜穿咗個窿，第二個醫生話「穿咗窿嘅邊邊已經有出現啲幻彩，咁即係六年間都冇惡化到，其實已經唔係急切性要補，但係如果要做白內障手術就真係要補返呢個窿之後先可以做，如果唔係個晶體有機會跌出嚟；而白內障都未係急切到要立即做，檢查視力得出結果唔算係太差（有考慮我爸爸年紀），但當然如果想睇嘢再清楚啲，而經濟上又唔係問題，咁就梗係做手術換咗佢啦，因為排政府真係要排好多年，同埋無得揀邊個醫生做。你哋返去慢慢考慮，不過最好六個月之後再嚟複診睇吓爸爸既視力有無變差」

總結：鄧醫生完全沒有站在病人的立場上提供任何專業意見；有違醫德；強烈不建議