[ 整形外科 ] 真心推介

好少寫評語，但我覺得鄭醫生真係好好，至少以我嘅經歷，真心推介。

一直都想割雙眼皮，但好怕做唔好。唔想搵美容院做，覺得唔夠專業；二來美容院多做吊線，效果last得唔耐。年頭的起心肝想做，所以做咗好多research，偶然喺網上討論區搵到鄭醫生嘅資料，全部都係好評，所以就搵佢諮詢下。

諮詢前姑娘先幫我影一幅相，然後醫生同我一齊分析我面形可以改善嘅地方。我主要想改善眼型，佢就幫設計適合我眼型嘅雙眼皮，講解唔同種類嘅手術方法同比佢做過嘅相/案例我參考；最後仲同我分析埋overall成塊面有冇其他地方可以改善。諮詢時有問必答，而且分析都係從我角度諗，針對我個人嘅問題黎改善作出建議。我完全覺得鄭醫生係一個好專業、細心同有要求嘅人。最後我聽醫生建議做開眼頭+小切口割雙眼皮，雖然價錢比美容院吊線貴3倍有多，諮詢亦要收費，但醫生令我好相信佢嘅專業，所以考慮咗一兩日就決定搵佢做，有budget嘅我覺得值得搵鄭醫生。

約咗兩個禮拜後做手術，手術當日醫生再次同我分析咗1個鐘，確定我滿意個高度同形狀，再帶到手術房。原本預3個鐘手術，但我左眼有肌肉下垂嘅情況所以搞耐咗，最後做咗約4個鐘，然後留多2個鐘敷冰，攞埋藥就返屋企，5-7日後返去搵醫生拆線。目前覆咗兩次診，傷口埋得好好，喺醫生手勢好，因為手術局部麻醉，所以過程非常清醒，感覺醫生好有耐性，間中叫我眨眼同坐起身俾佢睇個效果，亦keep住問你有冇唔舒服，過程完全唔痛。

唯一由第一次開始，已經覺得姑娘服務態度有待改善，尤其其中一位姑娘語氣非常差，好似吩咐你做嘢咁，但幫醫生嘅時候就錯漏百出；其他姑娘態度好好但感覺都不是非常專業，所以我去都係因為鄭醫生。