應該睇邊科？

醫生你好！
有個問題已經纏繞咗一年半有多，睇左好多醫生都搵唔到病因，好辛苦好困擾日常生活！請醫生幫幫手，資料如下：
男性，32歲
病徵1）行路嘅時候個人好似企唔穩咁，每行一步都沉一沉，感覺就好似踩棉花，或者係落船搖下搖下嘅感覺，有時好似有人推我咁，會想跌，但旁人睇我行路覺得我完全冇問題，行得好正常，唔覺得我似會跌。情況一年半有多，每天如是。（最主要係呢個病徵好影響日常生活）
病徵2）左邊後腦至頸部常覺不舒服，似有野壓住後尾枕。
病徵3）左耳常塞，搭𨋢去到十樓左右就會塞左。
病徵4）後腰條骨有一節按下時會痛，有時彎腰都會痛。
.
以下係我睇過的專科：
1）一開始睇椎醫，照x ray 指脊椎有少少彎曲，及頸椎較直。但唔算大問題。
2）然後睇耳鼻喉科，冇問題，唔係耳水不平衝。照鼻，耳，頸甲狀線，全部正常。
3）之後睇腦神經科，照頭部mri，驗血。腦一切正常，驗血報告指白血球數較偏低，但腦科醫生話唔係大問題。
4）一段時間後，情況仍然一樣，再睇一次腦神經科，再照腦mri，驗血，肝腎功能，甲狀線，全部正常。
5）轉睇精神科，醫生話係焦慮症，食左三四個月血清素加其他輔助藥如減慢心跳，但清況一樣，完全冇改善，精神仲比之前更差，影響工作。
.
最近覺得情況又差咗，行路浮沉感愈來愈嚴重（但重申一次旁人睇我係冇問題），最近亦常頭痛頭暈，好想知道自己究竟咩事，要睇咩科先可以幫到我？
大約6個月前照過腦，一切正常，使唔使再照一次？
定係要睇頸/腰？行路浮沉關唔關頸腰事？咁要睇咩科？
定係其他身體問題？
請如果有醫生解答到，請幫下我！！
謝謝！

方子明醫生回覆:
09/05/2017

你好，
據你所說頭頸及腦的MRI已經做了但找不到原因，耳鼻喉科和精神科醫生亦都看過、血也驗了都找不到問題所在，你的問題可能不是單一原因引至或單一專科可以醫治，我考慮找一位相熟的家庭科醫生作詳細診斷及需要時專科轉介

以上資料只供參考，不能作診症用途，
請與家庭醫生查詢並作出適合治療。
如有身體不適請即求診，切勿延誤治療。
若資料有所漏誤，本網及相關資料提供者恕不負責。